ញ៉ូវយ៉ក៖ អគ្គលេខាធិការអង្គការសហប្រជាជាតិលោក Antonio Guterres បានអបអរសាទរសម្ដេចមហាបវរធិបតី ហ៊ុន ម៉ាណែត ចំពោះការចូលមកកាន់តំណែងជានាយករដ្ឋមន្ត្រីថ្មីរបស់ប្រទេសកម្ពុជា។ លោកបញ្ជាក់ថា UN នៅតែរក្សាការងារជាមួយរដ្ឋាភិបាលថ្មីរបស់កម្ពុជាដើម្បីជាប្រយោជន៍ដល់ប្រជាជាតិខ្មែរទាំងមូលផងដែរ។

ក្នុងលិខិតចុះថ្ងៃទី៦ ខែកញ្ញា ឆ្នាំ២០២៣ លោក Antonio Guterres បានលើកឡើងថា លោកនឹងនៅតែបន្តគាំទ្រដល់ទំនាក់ទំនងកម្ពុជា-អង្គការសហប្រជាជាតិក្នុងរដ្ឋាភិបាលអាណត្តិថ្មីរបស់កម្ពុជា។

ក្នុងលិខិតនោះសរសេរថា៖ «អង្គការសហប្រជាជាតិនៅតែប្ដេជ្ញាចិត្តក្នុងការធ្វើការជាមួយរដ្ឋាភិបាលរបស់លោកតាមរយៈក្រុមការងាររបស់អង្គការសហប្រជាជាតិក្នុងប្រទេសដើម្បីជាគុណប្រយោជន៍សម្រាប់ប្រជាជនកម្ពុជា»។

ជាមួយគ្នានោះលោកបានលើកទឹកចិត្តដល់រដ្ឋាភិបាលកម្ពុជាជំរុញឱ្យមានការចូលរួមផ្នែកនយោបាយរបស់ស្ត្រី និងលើកកម្ពស់សិទ្ធិមនុស្ស និងការចូលរួមយ៉ាងរឹងមាំរបស់ប្រជាពលរដ្ឋ ដែលទាំងអស់នេះជាកត្តាជំរុញឱ្យមាននិរន្តរភាពនៃការអភិវឌ្ឍន៍ និងមានសារៈសំខាន់ចំពោះនិរន្តរភាពសន្តិភាពដែលទទួលបានដោយលំបាកនៅកម្ពុជាផងដែរ។

គួរឱ្យដឹងផងដែរថានាយករដ្ឋមន្ត្រីកម្ពុជា ហ៊ុន ម៉ាណែត បានក្លាយជានាយករដ្ឋមន្ត្រីទី៣៤ ជាផ្លូវការរបស់កម្ពុជានៅថ្ងៃទី២២ ខែសីញ្ញា ឆ្នាំ២០២៣ បន្ទាប់ពីទទួលបានការគាំទ្រពីសភា៕